Chempionatlar
Milliy va xalqaro kasbiy mahorat chempionatlari.
WorldSkills Bukhara — 2025
Buxoro · 20-dekabr, 2025 — 28-dekabr, 2025
WorldSkills Bukhara — 2025 hududiy chempionati 2025-yil 20–28-dekabr kunlari Buxoro shahrida 2 ta kasb yo‘nalishi bo‘yicha o‘tkazildi va yilning yakuniy hududiy bosqichi bo‘ldi.
Batafsil
WorldSkills Asia Taipei 2025
Taypey · 24-noyabr, 2025 — 2-dekabr, 2025
«WorldSkills Asia Taipei 2025» xalqaro kasbiy mahorat chempionati 2025-yil 27–29-noyabr kunlari Xitoy Tayvani Respublikasining Taypey shahrida o‘tkazildi. Musobaqa har kuni soat 09:00 dan 18:00 gacha davom etdi. O‘zbekiston terma jamoasi 16 ta yo‘nalish bo‘yicha qatnashdi: raqamli muhandislik (CAD), CNC tokarlik, avtokuzov ta’mirlash, elektronika, veb-texnologiyalar, elektr montaj ishlari, quruq qurilish va suvoq ishlari, bo‘yash va pardozlash (ko‘rgazmaviy kasb), kosmetologiya, avtomobil texnologiyalari, oshpazlik, avtomobil bo‘yash, sovutish va konditsioner tizimlari, grafik dizayn texnologiyasi, tibbiy va ijtimoiy parvarish hamda sanoat dizayni texnologiyasi. Chempionatda jami 29 ta davlat ishtirok etdi. Delegatsiya 24-noyabr kuni Toshkentdan uchib ketdi; 26-noyabr kuni ish o‘rinlari, zamonaviy texnik jihozlar va xavfsizlik talablari bilan tanishish hamda xalqaro standartlar asosidagi malaka oshirish mashg‘ulotlari o‘tkazildi. O‘zbekistonning ishtirok hajmi 2023-yilga nisbatan uch baravar kengaydi. Tanlangan yo‘nalishlar eksportga yo‘naltirilgan iqtisodiyot ehtiyojlariga mos bo‘lib, vakillarimiz Janubiy Koreya, Yaponiya, BAA va Xitoy Taypeyi kabi Osiyo yetakchilari bilan teng raqobatlashdi. Ushbu ishtirok 2026-yilgi «WorldSkills Shanghai» jahon chempionatiga tayyorgarlikning muhim bosqichi hisoblanadi.
Batafsil
TurkicSkills — 2025
Aqtau · 4-oktabr, 2025 — 9-oktabr, 2025
TurkicSkills — turkiy davlatlar o‘rtasidagi kasbiy mahorat chempionati. Birinchi TurkicSkills-2025 xalqaro chempionati 2025-yil 4–9-oktabr kunlari Qozog‘istonning Aqtau shahrida o‘tkazildi. O‘zbekistondan 9 nafar ishtirokchi — Samarqand viloyatidan 6, Buxoro viloyatidan 2 va Farg‘ona viloyatidan 1 nafar vakil qatnashdi. Terma jamoa 2-o‘rin va Mahorat medalloni (Medallion for Excellence) bilan qaytdi. Payvandlash (Welding) yo‘nalishida Xoliqulov Javohir Abdullayevich 2-o‘rinni egalladi. To‘qqiz kasbiy yo‘nalish bo‘yicha bellashuvlarda u O‘zbekiston nomidan sovrinli o‘rinni qo‘lga kiritgan birinchi ishtirokchi bo‘ldi. Chempionat turkiy tilli davlatlarning kasb-hunar ta’limi tizimlarini yaqinlashtirish va umumiy malaka talablarini shakllantirishga xizmat qiladi.
Batafsil
WorldSkills Andijan — 2025
Andijon · 20-sentabr, 2025 — 28-sentabr, 2025
WorldSkills Andijan — 2025 hududiy chempionati 2025-yil 20–28-sentabr kunlari Andijon shahrida 6 ta kasb yo‘nalishi bo‘yicha o‘tkazildi. Chempionat Farg‘ona vodiysidagi kasb-hunar ta’limi salohiyatini namoyish etdi.
Batafsil
WorldSkills Samarkand — 2025 (sentabr)
Samarqand · 7-sentabr, 2025 — 12-sentabr, 2025
«WorldSkills Samarqand — 2025» V Milliy kasblar chempionati 2025-yil 7–12-sentabr kunlari Samarqand shahrida o‘tkazildi. Chempionat doirasida «Quruq qurilish va suvoq ishlari» kompetensiyasi bo‘yicha WorldSkills standartlari asosidagi V Respublika tanlovi bo‘lib o‘tdi. Tanlov Oliy ta’lim, fan va innovatsiyalar vazirligi Samarqand viloyati hududiy boshqarmasi, KNAUF kompaniyasi, WorldSkills Uzbekistan va Samarqand shahar 3-son politexnikumi hamkorligida tashkil etildi. Ishtirokchilar ekspertlar nazoratida quruq qurilish konstruksiyalarini montaj qilish va suvoq ishlari bo‘yicha amaliy modullarni bajardi. Chempionat g‘olibi (1-o‘rin) WorldSkills Asia Taipei 2025 xalqaro chempionatiga yo‘llanma oldi. Ushbu kompetensiya bo‘yicha Taipei 2025 da O‘zbekiston nomidan Nusratov Sobirjon Istam o‘g‘li qatnashdi. Ishtirokchilar, ekspertlar va sohani rivojlantirishga hissa qo‘shgan mutaxassislar tashkilotchilar va KNAUF kompaniyasining diplomlari hamda esdalik sovg‘alari bilan taqdirlandi. Chempionat g‘oliblari 2025-yil 13-sentabrda e’lon qilindi.
Batafsil
Rail Vehicle Technology — 2025, Chanchun
Chanchun · 22-may, 2025 — 27-may, 2025
Rail Vehicle Technology Skill Competition — temir yo‘l harakat tarkibi texnologiyasi yo‘nalishi bo‘yicha xalqaro kasbiy mahorat musobaqasi. Musobaqa Xitoyning Chanchun shahrida o‘tkazildi va 2025-yil 27-may kuni yopilish marosimi bilan yakunlandi, natijalar rasman e’lon qilindi. O‘zbekiston sharafini Samarqand temiryo‘l texnikumi o‘quvchilaridan iborat Uzbekidron jamoasi himoya qildi: • Nosirov Kodirjon Nodirjon o‘g‘li • Eshonkulov Sherbek Olim o‘g‘li Jamoa xalqaro mehmon jamoalar orasida faxrli 2-o‘rinni qo‘lga kiritdi va WorldSkills Shanghai 2026 jahon chempionatiga yo‘llanma oldi. Samarqand temiryo‘l texnikumi o‘quvchilari xalqaro maydonda ketma-ket ikkinchi bor 2-o‘rinni egallashdi. Xalqaro mehmon jamoalar natijalari: 1-o‘rin — Zambiya 2-o‘rin — O‘zbekiston 3-o‘rin — Malayziya va Qozog‘iston Xitoy jamoalari orasida 1- va 2-o‘rinlarni Changchun Digital Technology College vakillari egalladi. Musobaqada qatnashgan 40 ta jamoadan 25 tasi saralash bosqichidan o‘tdi: ulardan 21 tasi Xitoy, 4 tasi xalqaro mehmon jamoalar.
Batafsil
IEK elektriklar chempionati — 2025, Novosibirsk
Novosibirsk · 2-aprel, 2025 — 3-aprel, 2025
IEK ochiq elektriklar chempionati — elektr montaj yo‘nalishidagi mutaxassislar uchun xalqaro kasbiy mahorat musobaqasi. Chempionatning hududlararo yarim final bosqichi 2025-yil 2–3-aprel kunlari Rossiyaning Novosibirsk shahrida o‘tkazildi. Samarqand viloyati Bulung‘ur tumanidagi 1-son politexnikum o‘quvchisi Norkoziyev Saidumar Ulug‘murod o‘g‘li «Elektromontaj» kompetensiyasi bo‘yicha 2-o‘rinni egalladi. Bu — O‘zbekiston kasbiy ta’limi tarixida elektromontaj yo‘nalishi bo‘yicha xalqaro maydonda qo‘lga kiritilgan ilk yutuq. G‘olib Skills Passport’ga qayd etilgan kumush medal (Silver Medal), xalqaro diplom, maxsus brend kiyim hamda zamonaviy ish asboblari to‘plami (toolbox) bilan taqdirlandi. «Bu bizning faxrimiz! Samarqand yoshlari xalqaro maydonlarda o‘z salohiyatini ko‘rsatmoqda!» — Nasimov Azizbek Azimovich, Samarqand viloyati Oliy ta’lim, fan va innovatsiyalar boshqarmasi boshlig‘i. «Bu g‘alaba — ustozlar, murabbiylar va o‘z kasbini sevgan yoshlar yelkasidagi mehnat mevasi!» — Norkulov G‘ayrat Murodovich, Samarqand viloyati Oliy ta’lim, fan va innovatsiyalar boshqarmasi boshlig‘i o‘rinbosari.
Batafsil
WorldSkills Samarkand — 2025 (yanvar)
Samarqand · 27-yanvar, 2025 — 4-fevral, 2025
WorldSkills Samarkand — 2025 hududiy chempionati 2025-yil 27-yanvardan 4-fevralgacha Samarqand shahrida o‘tkazildi. Chempionatda 5 ta kasb yo‘nalishi bo‘yicha bellashuv tashkil etilib, hududdagi kasb-hunar ta’limi muassasalari vakillari ishtirok etdi.
Batafsil