Santexnika va isitish
Suv va isitish tizimlarini o‘rnatish.
Santexnik va isitish tizimi ustasi binoga suv, issiqlik va kanalizatsiyani olib kiradi. Uning ishi ko‘pincha devor ichida yashirin qoladi — ammo bir chok noto‘g‘ri bajarilsa, butun qavat suv ostida qoladi.
Musobaqada mis, po‘lat va polimer quvurlar bilan ishlanadi: mis lehimlanadi, po‘lat rezbalanadi yoki presslanadi, plastik payvandlanadi. Radiator, kollektor, nasos va boshqaruv avtomatikasi ulanadi, tizim bosim ostida sinab ko‘riladi. Ba’zi modullarda quyosh kollektori yoki issiqlik nasosi kabi energiya tejovchi yechimlar ham beriladi.
2025-yilgi Samarqand bosqichida bu yo‘nalishda 14 nafar ishtirokchi bellashgan.
Ishtirokchiga talablar
Aksonometrik va reja chizmalarini o‘qish, quvur diametri va qiyaligini hisoblash, tizim gidravlikasini tushunish.
Mis lehimlash (yumshoq va qattiq), po‘lat rezba ochish, PPR payvandlash va press-fitting bilan ishlash ko‘nikmalari.
Ochiq olov bilan ishlash va bosim sinovi xavfsizligi qoidalarini bilish.
Kerakli jihozlar
Quvur kesgich, rezba ochish asbobi, press-kleshcha va matritsalar to‘plami, PPR payvandlash apparati, gaz gorelkasi.
O‘lchov: sath, burchak o‘lchagich, ruletka, bosim manometri va opressovka nasosi.
Materiallar: mis, po‘lat va PPR quvurlar, fitinglar, radiatorlar, kollektor va sirkulyatsiya nasosi.
Baholash mezonlari
Germetiklik — birinchi va bosh mezon: tizim belgilangan bosimda belgilangan vaqt davomida sizmasligi kerak. Sizish aniqlansa, modul bo‘yicha jiddiy ball yo‘qotiladi.
O‘lchov: quvur o‘qlarining chizmaga mosligi, qiyalik, o‘rnatish balandligi, qistirma oraliqlari.
Ekspert bahosi: lehim va payvandlash choklarining tozaligi, quvur yo‘nalishining tartibliligi, ishlatilgan material miqdori va ish o‘rni holati.