WorldSkills Uzbekistan va WorldSkills Korea: hamkorlikning yangi bosqichi
WorldSkills Shanghai 2026 doirasida WorldSkills Uzbekistan, WorldSkills Korea hamda HRDK — Human Resources Development Service of Korea vakillari o‘rtasida uchrashuv o‘tkazilib, mavjud hamkorlikni rivojlantirish va keyingi amaliy qadamlar muhokama qilindi.
Uchrashuvda uchta ustuvor yo‘nalishga alohida e’tibor qaratildi:
1. K-Star dasturini davom ettirish
O‘zbekistonda kasbiy ta’lim mutaxassislari, ekspertlar va pedagoglarning professional salohiyatini oshirishda Koreya tajribasidan foydalanish, K-Star dasturi doirasidagi hamkorlikni davom ettirish hamda uni yangi kasblarga kengaytirish masalalari muhokama qilindi.
2. WorldSkills Korea bilan tizimli hamkorlikni davom ettirish
Tomonlar WorldSkills chempionatlari, ekspertlarni tayyorlash, kasbiy mahoratni baholash, metodik tajriba almashish va xalqaro standartlarni joriy etish bo‘yicha qo‘shma ishlarni davom ettirishga qiziqish bildirdi.
3. Koreyaning NCS — National Competency Standards tizimini chuqur o‘rganish
Uchrashuvning muhim yo‘nalishlaridan biri Koreyaning NCS — National Competency Standards, ya’ni Milliy kasbiy kompetensiya standartlari tizimini o‘rganish va ushbu yo‘nalishda O‘zbekiston bilan hamkorlikni rivojlantirish bo‘ldi.
NCS oddiy kasb standarti emas. Koreyada ushbu tizim muayyan ishni bajarish uchun xodimga zarur bo‘lgan bilim, amaliy mahorat va professional munosabatlarni sanoatdagi real ish jarayonlari asosida tizimlashtiradi.
Har bir kasbiy faoliyat alohida kompetensiya birliklari — competency unitsga ajratiladi. Ularda:
• bajarilishi kerak bo‘lgan ish vazifalari;
• aniq performance criteria — bajarish mezonlari;
• zarur bilim, mahorat va munosabatlar;
• foydalaniladigan jihoz, vosita va ish sharoitlari;
• natijani tekshirish uchun baholash mezonlari va yo‘riqnomalari belgilanadi.
Shu sababli NCS tizimi ish beruvchi — kasbiy ta’lim — o‘qitish — baholash — malaka — bandlik zanjirini o‘zaro bog‘lash imkonini beradi. Koreyada NCS amaliyotga yo‘naltirilgan ta’lim dasturlarini ishlab chiqish, milliy malakalarni shakllantirish va qayta ko‘rib chiqish, malaka imtihonlarini ish joyidagi real vazifalarga yaqinlashtirish hamda kompetensiyaga asoslangan kadrlar boshqaruvida qo‘llanadi.
NCSda kasbiy darajalar tizimi ham mavjud bo‘lib, u sanoatdagi ish darajalarini ta’lim, professional tayyorgarlik va malaka tizimi bilan bog‘lashga xizmat qiladi.
O‘zbekiston uchun ushbu tajribani o‘rganish ayniqsa muhim.
Kelgusida Koreya bilan hamkorlik doirasida:
kasbiy standartlarni ishlab chiqish → ta’lim dasturlarini shakllantirish → o‘qitish → mustaqil baholash → malakani tan olish → mehnat bozori talabi
o‘rtasidagi uzviy bog‘liqlikni yanada kuchaytirish imkoniyatlarini o‘rganish rejalashtirilmoqda.
Bu esa kasbiy ta’limda nafaqat “nima o‘qitildi?”, balki eng muhimi — “bitiruvchi real ish joyida nimani bajara oladi va uning mahorati qanday aniq mezon asosida baholanadi?” degan savolga javob beradigan tizimni rivojlantirishga xizmat qiladi.
WorldSkills Uzbekistan xalqaro tajribani o‘rganish, uni milliy tizimga moslashtirish va O‘zbekistonda kasbiy mahoratni baholashning zamonaviy mexanizmlarini rivojlantirish bo‘yicha hamkorlikni davom ettiradi.
WorldSkills — chempionatdan kengroq tushuncha. Bu kasbiy standart, ta’lim, baholash va mehnat bozorini yagona tizimda bog‘lash imkoniyatidir.
Izohlar
Izoh darhol saytda chiqadi. Hurmat bilan yozing — haqoratli izohlar o‘chiriladi.
Hali izoh yo‘q. Birinchi bo‘lib fikr bildiring.
